Многу намирници што ги консумираме секојдневно се богати со шеќер. Иако е сосема во ред, па дури и неопходно е да се јаде шеќер, луѓето во просек консумираат поголеми количини од препорачаните.
Регистрираната нутриционистка Викторија Тејлор објаснува дека повеќето луѓе имаат природна склоност кон благо, така што храната богата со додаден шеќер често станува секојдневен дел од нашата рутина без воопшто да забележиме.
„Луѓето често консумираат слатка храна како награда или утеха доколку имале лош ден. Поради ова, зависноста од овој вид на храна буквално може да се развие со текот на времето. Имено, постојат одредени студии чии резултати укажуваат дека шеќерот предизвикува зависност на сличен начин како тутунот, алкохолот или дрогата“, додава Тејлор, која издвои неколку совети за сите оние кои мислат дека консумираат премногу храна богата со рафиниран шеќер.
„Понекогаш може да биде тешко да се промени начинот на кој размислуваме за нашите омилени слатки и кога или колку често сакаме да ги јадеме. За да се ослободиме од оваа лоша навика и да создадеме нови, здрави навики, важно е да се обидеме да го отстраниме искушението и да ја промениме околината, без разлика дали станува збор за одење во друга соба или одење на прошетка кога ќе добиеме желба за благо“, советува таа.
Како да препознаете зависност од шеќер?
Според Клиниката во Кливленд, постојат одредени знаци кои укажуваат дека можеби сме зависни од шеќер. Ова подразбира неможност да се самоконтролира количината на слатка храна што ја јадеме, често размислувајќи за слатка храна, јадење слатка храна дури и кога воопшто не сме гладни, како и конзумирање слатка храна кога се чувствуваме фрустрирани, тажни или под стрес.
