Вчера Камала Харис положи заклетва и стана првата жена потпретседател во историјата на САД.
Иако гласачите бираа помеѓу Доналд Трамп и Џо Бајден, слободно може да се каже дека Камала Харис и Бајден заедно, рамо до рамо, победија на претседателските избори во САД, одржани во ноември 2020 година.
Сепак, фановите на легендарната анимирана ТВ-серија „Симпсонови“ (The Simpsons) се убедени дека судбината на новиот потпретседател на Америка била предодредена уште пред изборите.
Серијата немаше анимирана верзија на Камала Харис, која работеше со претседателот, но во 2000 година се појави епизода со наслов „Барт кон иднината“ (Bart To The Future), во која Лиса стана првата жена претседател на САД по владеењето на Доналд Трамп.
Имено, обожавателите велат дека фактот дека Камала Харис е првата жена некогаш именувана на позицијата потпретседател во САД е пресвртница која не се разликува премногу од она што го замислуваа „Симпсонови“ пред 21 година и дека, како во епизодата, нејзиниот мандат започнува откако заврши владеењето на Трамп.
Сепак, нејзиниот моден избор за вчерашната свечена инаугурацијата беше она што навистина ги натера луѓето да се прашуваат дали „Симпсонови“ сепак предвидоа сѐ?
Новата потпретседателка на Америка на церемонијата носеше сино-виолетов капут и бисерен ѓердан - во 2000 година, креаторите на „Симпсонови“ ја покажаа Лиса облечена во истата модна комбинација.
Твитерџиите веднаш ја истакнаа неверојатната сличност, а некои се прашуваа дали Камала Харис се инспирирала од Лиса во серијата.
Секако, можно е и креаторите на „Симпсонови“, и Камала Харис едноставно да ја сметаат виолетовата за соодветна боја за ваков важен настан, но имајќи предвид колку работи предвидела серијата досега, не треба да се исклучи ниту една можност.
Креаторите на „Симпсонови“ го предвидоа Трамп како претседател на САД, ширењето на вирусот ебола, паметните телефони, настапот на Лејди Гага на Супербоул…
