Претседателот на Наполи, Аурелио Де Лаурентис, даде многу контроверзна изјава дека повеќе нема да носи играчи од Африка бидејќи, како што наведе, клубот им плаќа, а тие се „секогаш недостапни поради други обврски“.
Тој смета дека Африканскиот куп на нации им прави голем проблем на клубовите кои ги плаќаат своите играчи, а во периодот кога се одржува клубовите остануваат без нивните услуги. Во таа насока Де Лаурентис изјави дека повеќе нема да ги купува африкански играчи и секако привлече големо внимание од тамошните медиуми.
Во тимот на Наполи моментално играат Виктор Осимхен и Андре Замбо Ангиса, кои ги претставуваат Нигерија и Камерун, додека Калиду Кулибали, кој со Сенегал го освои Африканскиот куп на нации, неодамна замина во Челси.
„Им реков на луѓето во клубот, не ми кажувајте повеќе за африканските фудбалери. Никогаш повеќе нема да ги купам. Ги сакам, но нека потпишат нешто за да се обврзат да не играат на Африканскиот куп на нации, бидејќи во спротивно, тие се практично секогаш недостапни“, рече Де Лаурентис и продолжи:
„Ние сме идиотите што ги плаќаме, а тие играат за други“.
После тоа, првиот човек на Наполи откри дека во 2017 година имал понуда да го продаде клубот за 900 милиони долари, но дека на крајот ја одбил можноста.
