Истражување покажа дека децата многу рано почнуваат со лажење, а тоа е важен дел од детскиот развој.
Лажењето не е нешто необично кај децата, а ново истражување покажа дека тоа е дури и важен дел од нивниот развој.
Според истражување на Канг Ли, професор по психологија на Универзитетот во Торонто, децата многу рано почнуваат со лажење. Меѓу двогодишните деца кои зборуваат, 30% од нив веќе излажале за нешто.
До навршени три години, скоро половина се обидуваат редовно да излажат за нешто. На четири години, тој број изнесува дури 80%. Во периодот од 5 до 7 години, скоро секое дете лаже.
Доктор Ли вели дека малите деца кои ја прикриваат или избегнуваат вистината, имаат когнитивна предност во однос на оние кои не го прават тоа.
„Лажењето бара две работи. Децата мора да разберат што некој друг мисли за нив. Оваа способност ја нарекуваме теорија на умот. Децата кои се подобри во теорија на умот се подобри и во лажење“, објаснува психологот.
Втора работа е да се знае однапред да се планира за да спречиме несакани активности. Околу 30% од децата помали од 3 години, кои знаат да лажат, имаат поголема способност за тоа. Лагите им помагаат да се извлечат од непријатни или за нив незгодни ситуации.
Таквите когнитивни способности кај децата кои рано почнуваат да лажат значи дека овие деца ќе бидат поуспешни на училиште и во комуникацијата со другите деца во парк.
Доктор Ли го спровел експериментот на теорија на умот на 85 деца на предучилишна возраст во Кина.
