Десетгодишно дете од Прилеп паднало од далновод под висок напон. Момчето од падот добило повреда со крвавење во мозокот и ќе биде пренесено на Ургентниот центар во Скопје.
Според информациите на МВР, вчера во 17:30 часот И.И.(30) од село Алданци, Крушево, пријавил во полиција дека на влезот на селото имало повредено дете.
Полицијата констатирала дека се работи за 10-годишно дете од Прилеп, кое со семејството престојувало во селото.
„Детето лежело покрај реката и било во свесна состојба, а по кажувањето на мајка му П.М., детето паднало од метален столб од далновод под висок напон, но бидејќи таа мислела дека се работи за струен удар, го однела до реката, каде што го измачкала со кал“, соопшти МВР.
Детето било пренесено во Општата болница – Прилеп, каде што дежурниот лекар изјавил дека детето било во контактибилна состојба, но поради крвавење во мозокот од помал обем, ќе биде пренесено на Ургентниот центар во Скопје.
