Она што веќе беше извесно, сега се официјализира. Чешка и Македонија ќе одиграат пријателски натпревар на 10 јуни во Прага.
За овој дуел со Чешка се зборуваше уште кога ФФМ откри дека е договорена пријателска на 3 јуни против Хрватска во Риека. Остануваше само Чешката федерација да го потпише договорот, што конечно се случи.
„Фудбалската федерација на Македонија постигна договор за одигрување на контролен натпревар помеѓу македонската репрезентација и селекцијата на Чешка“, објави ФФМ на својата веб-страница. Натпреварот го потврди и чешката страна на веб-страницата на ФАЧР.
Со тоа се комплетира јунскиот прозорец, кој ќе биде последен тест за Македонија пред новата сезона во Лигата на нации, која почнува во септември.
Од договорената контролка задоволен е и селекторот Благоја Милевски.
„Мило ми е што постигнавме договор со Чешката фудбалска федерација да одиграме натпревар кој ќе биде одличен тест за двете селекции. Противникот бараше натпревар против нас, а тоа е потврда и за нашиот квалитет. Репрезентација на Чешка, учесник на претстојното Европско првенство, ќе биде поттик за нашата репрезентација да влезе во натпреварувачки ритам пред да започнеме со официјалните натпревари од новото издание на Лига на нации. Чешка има силен тим, но сакаме да видиме каде сме во тој момент и што треба уште да подобриме во пресрет на отворањето на Лигата на нации. Сигурен сум дека гледачите ќе уживаат во квалитетен натпревар“, изјави селекторот на македонската репрезентација.
Македонија ќе игра и во март, два натпревара, а најверојатно ќе се оди во Анталија каде ќе се игра против Црна Гора и Молдавија.