Регион

Доналд Туск: Балканот е подраматичен од „Game of Thrones“

12. јануари 2018 - 8:45 | А.С.

Претседателот на Европскиот совет Доналд Туск смета дека историјата на Балканот е подраматична и поинтересна од дејството во популарната ТВ-серија „Game of Thrones“.

Тој предупредува дека на Западен Балкан, каде Брисел се обидува да воспостави тесни врски со земјите кои сакаат да се приклучат на ЕУ, не треба да се дозволи да се случи сценарио од популарната серија.

„Сите би сакале на Балканот сега и во иднина да гледаме помалку драматични сценарија“, рече Туск во говорот на свеченоста за преземање на претседателството со Европскиот совет во Софија.

Туск додаде дека луѓето во целиот регион заслужуваат стабилност, безбедност и напредок и дека целта на ЕУ е тоа сценарио да го претвори во реалност.

Бугарија, Романија, Словенија и Хрватска се единствените земји во регионот кои досега успеаја да пристапат на ЕУ.

Во Софија беа изразени надежи за обновување на преговорите за пристапување на Црна Гора и на Србија во Унијата, како и за помош за Албанија и Македонија за приближување кон почеток на преговори за членство во ЕУ.

Коментирај