Војската во Мјанмар денеска изврши државен удар против Владата на Аунг Сан Су Ќи на денот кога пратениците требаше да се вратат во Парламентот, првпат по изборите во ноември минатата година, а кои војската ги смета за нерегуларни.
Прогласена е вонредна состојба, а војската соопшти дека апсењата на лидерката и други функционери е одговор на изборната измама.
Во видео обраќањето објавено на телевизија, над која надзор има војската, се вели дека владата му е предадена на главниот командант на вооружените сили, генерал Мин Анг Хлаинг.
Рано изутрина војската ја уапси Аунг, како и претседателот Вин Минт, потврди портпаролот на Националната лига за демократија. Партијата победи на изборите во ноември, но тензиите со војската станаа поинтензивни минатата недела.
Националната лига за демократија на популарната Аунг Сан Су Ќи доби 83 проценти од 476 места во парламентот, но војската тврди дека открила 10 милиони случаи на измама и побара објавување на изборните листи поради измама.
