Кристијано Роналдо не беше расположен по победата против Џенова и го фрли дресот на Јувентус.
„Старата дама“ ја победи Џенова со 3:1, но Португалецот не беше задоволен. Не успеа да се запише во листата на стрелци, пропушти голема шанса во првото полувреме, а беше особено нервозен во второто полувреме и бараше од соиграчите подобро да го ангажираат на теренот.
По последниот судиски свиреж беше видно незадоволен, па се соблече и го фрли дресот покрај противничкиот гол.
Ова го искористи едно од момчињата кои собираат топки и неочекувано доби вреден сувенир.
Португалецот направи нешто слично по мечот меѓу Португалија и Србија, кога не беше задоволен од одлуката на судијата да поништи чист гол и ја фрли капитенската лента.
Многу навивачи на Јувентус го критикуваа Роналдо на социјалните мрежи бидејќи го фрлил дресот на нивниот сакан клуб.
За време на прес-конференцијата по натпреварот, тренерот на Јувентус, Андреа Пирло, рече дека Роналдо нема да биде казнет за ваквиот потег.
„Нормално е дека сака да постигне гол, особено кога натпреварот ќе се искомплицира. Тој е шампион и секогаш сака да остави свој белег. Мислам дека клубот нема да го казни, беше вознемирен, тоа им се случува на другите играчи. Натпреварот заврши и нормално е да се биде нервозен“, го правдаше Пирло најдобриот стрелец на Јуве.
Некои италијански медиуми подоцна објавија текстови во кои се известува дека „Роналдо сакал да му подари дрес на собирачот на топки“.