Турскиот претседател Реџеп Тајип Ердоган рече дека масовното пукање во кое беа убиени 50 луѓе во џамии во Нов Зеланд, е дел од една поширока акција против Турција и се закани на сите кои ќе се обидат да влезат во војна со Истанбул, дека ќе бидат вратени во ковчег.
„Оние на Нов Зеланд, оддалечени 16.500 километри, нѐ тестираат со пораките што ни ги испраќаат. Ова не е дело на поединец, ова е организирано“, рече Ердоган.
Брентон Тарант (28) од Австралија е обвинет за нападот на 16 март врз две џамии, при што уби 50 луѓе во Крајстчерч, Нов Зеланд.
На предизборните митинзи во текот на викендот, Ердоган покажа видеоснимка од нападите што Тарант ја објави на Facebook, поради што наиде на критики од министерот за надворешни работи на Нов Зеланд, кој рече дека тоа може да ја загрози безбедноста на државјани на Нов еланд во странство.
Ердоган рече дека напаѓачот објавил закани против Турција и против него како претседател и дека сакал да ги протера Турците од северозападниот, европски дел на Турција.
„Ние сме тука веќе 1.000 години и ќе бидеме до Судниот ден“, рече Ердоган на собир по повод годишнината од Битката кај Галиполи од 1915 година, кога војниците на Отоманското царство ги поразиле војските на Велика Британија, Австралија и Нов Зеланд во обид да го заземат полуостровот.
Ердоган рече дека никој нема да го претвори Истанбул во Костантинопол.
„Вашите дедовци дојдоа овде и се вратија во ковчези. Не се сомневајте, ќе бидете вратени како вашите дедовци“, рече тој.
