Данскиот играч одигра 80 минути кои му беа многу потребни, иако на пријателски натпревар, и е доста задоволен од својата игра.
„Се чувствувам доста добро. Беше тежок тест последнава недела и нешто, но среќен сум што сум тука“, вели тој во изјава за официјалната клупска веб-страница.
Ериксен нема одиграно официјален натпревар по немилиот настан на ЕУРО 2020 кога доби срцев удар. Му беше вграден дефибрилатор поради кој не можеше да игра во Италија, па зимава дојде во Брентфорд.
Настапи на два пријателски натпревари со Саутенд и сега последно со шкотски Ренџерс, на кој одигра 80 минути, а натпреварот заврши 2:2 и притоа асистираше на двата гола.
„Чувствувам дека сум на добро место, ментално и физички добро влегувам во натпреварите, што е најважно во моментов. Всушност, малку сум изненаден што моето тело се однесува на начинот на кој што се однесува бидејќи тренирав напорно, но не очекував да бидам толку добар како што се чувствувам. Ова е дефинитивно нешто многу позитивно“, радо вели тој.
Ериксен беше промовиран пред навивачите на Брентфорд пред ремито без голови дома со Кристал Палас предминатиот викенд, но сѐ уште не бил повикан во составот на Томас Франк за натпревар од Премиер лигата.
Тоа може да се смени претстојниов викенд кога в сабота „Пчелите“ дома го пречекуваат Њукасл, нов важен натпревар против конкурент во битката за опстанок. Потоа доаѓа ист таков натпревар кај Норич, седум дена подоцна.
„Ја чуствувам истата возбуда, истата љубов за допир на топката, и генерално да бидам инволвиран и да играм фудбал“, рече Ериксен за неговото досегашно искуство во тимот од Западен Лондон.