Европската комисија денеска го претстави планот „Штедете гас за посигурна зима“, кој предвидува намалување на потрошувачката на гас за 15 проценти во периодот од 1 август годинава до 31 март 2023 година.
Европската Унија се соочува со опасност од натамошно намалување на протокот на гас од Русија, кој Кремљ го користи како оружје, а речиси половина од земјите-членки веќе се погодени од намалените испораки.
Оттука, Комисијата посочува дека е потребно навреме да се делува, веднаш да се преземат чекори со цел значително да се намалат ризикот и трошоците за Европа во случај на натамошни нарушувања во снабдувањето со гас. Планот за намалување на потрошувачката на гас предвидува сите потрошувачи, домаќинствата, јавната администрација, сопствениците на јавни згради, производителите на енергија и индустријата да преземат мерки во оваа смисла на доброволна основа.
Комисијата предлага нова регулатива за координирано намалување на побарувачката на гас, која ќе постави цели за сите земји-членки да ја намалат побарувачката за гас за 15 отсто од 1 август 2022 година до 31 март 2023 година.
Предлогот за регулатива ѝ дава можност на Комисијата, по консултации со земјите-членки, да прогласи тревога на ниво на Унијата, што би наметнало обврзувачко намалување на потрошувачката на гас за сите земји-членки. Таква вонредна состојба може да се прогласи во случај на голем ризик од недостиг на гас или исклучително висока побарувачка за гас.
Комисијата, исто така, ги повика земјите-членки да започнат јавна кампања за подигање на свеста за потребата од намалување на греењето и ладењето. Земјите-членки би можеле, на пример, да утврдат дека јавните згради се загреваат за неколку степени помалку или дека интензитетот на ладење е намален во текот на летните месеци.