Компанијата Meta го менува „системот за идентитет“ на социјалната мрежа Facebook, а тука спаѓа и промена на изгледот на логото.
Сепак, промената не е многу очигледна, освен што сината боја е многу потемна, а буквата „f“ е суптилно изменета.
„Нашата намера беше да создадеме освежен дизајн на логото на Facebook кој е похрабар, 'електричен' и безвременски. Секое од новите подобрувања води до поголема хармонија низ дизајнот како клучен елемент на идентитетот на апликацијата. Ова го направивме со појасно изразување на фундаментална Facebook сина боја која е визуелно 'подостапна' во нашата апликација и ѝ дава посилен контраст на буквата 'f' за да се истакне“, соопштија од Meta.
Иако промените се суптилни, сепак има смисла Meta да го освежи логото на Facebook наместо целосно да го редизајнира. Од компанијата велат дека социјалната мрежа дневно има 2 милијарди активни корисници, што значи дека секоја визуелна промена ќе ја видат многу луѓе. Затоа, разбирливо е дека Meta избира релативно мали промени на едно од најпрепознатливите логоа.
Meta го промени и изгледот на фонтот што се користи за пишување на името на социјалната мрежа и користеше прилагоден фонт, Facebook Sans. Има и нова палета на бои во која доминираат сините нијанси, а изменет е и изгледот на емотиконот Reactions.
Од компанијата велат дека ова е само првата фаза од освежувањето на идентитетот на Facebook.
