Просторот во кој го поминуваме денот во голема мера влијае на нашето расположение, па затоа е многу важно да го уредиме на начин што ќе ни ја зголеми удобноста и уживањето.
Фенг шуи (или фенг шуеј) е древен кинески систем кој синтетизира повеќе учења, вештини и техники, со цел човекот да се врати или да се задржи во допир со природата. Зборовите „фенг шуи“ буквално би се превеле како „воздух-вода“ на македонски.
Во модерното живеење, фенг шуи се толкува како праксата на уредување на предметите во просторот со цел да им помогне на луѓето да ги постигнат своите цели.
Според фенг шуи, просторот во кој живееме треба да биде прозрачен, уреден во светли бои, со удобен мебел. Треба да се избегнува блокирање на вратите и „пресекување“ на отворениот простор со столбови.
Расчистете ги полиците и фрлете ги непотребните работи што само ви зафаќаат простор, а не ги користите или немаат никаква емотивна важност за вас.
Особено треба да обратите внимание на оштетени предмети кои може да влијаат на вашата продуктивност и чувство на среќа. Расипано ѕвонче на вратата, на пример, според фенг шуи може да го спречи посетувањето на вашиот дом и да ги блокира позитивните работи што доаѓаат кон вас.
Поправете ги плакарите, фрлете ја облеката што ја чувате со години без некаква посебна причина. Со расчистувањето на плакарите и полиците, ви всушност расчистувате со минатото и се ослободувате од негативни сеќавања и заостанати емоции.
Ако сликите и фотографиите на ѕидовите ви се наместени на криво или премногу ниско, исправете ги и поставете ги повисоко. Ниско поставените слики со себе ја влечат енергијата и расположението во просторијата според фенг шуи.
Исто така се препорачува креветите секогаш да имаат ногарки за да не лежат директно на подот.
Отворете го просторот, редовно проветрувајте го и ставете повеќе билки и растенија во вашиот дом. Дозволете му на просторот да дише, а така и вие полесно ќе дишете.
