По барање на САД, властите на Фиџи запленија јахта на руски олигарх, вредна 300 милиони долари, соопшти американското Министерство за правда.
Судот на Фиџи вчера пресуди дека САД можат да ја запленат суперјахтата на Сулејман Керимов, неколку недели откако истата пристигна во таа островска држава. Властите во повеќе земји запленија луксузни јахти и вили во сопственост на руски милијардери, како одговор на санкциите кои се воведени за Русија поради инвазијата во Украина.
Керимов е под американски санкции уште во 2014 година и 2018 година поради руски акции во Сирија и во Украина. Исто така е под санкции на ЕУ.
Луксузната јахта Amadea пристигна на Фиџи минатиот месец, по 18-дневно патување преку Пацифик, од Мексико. Станува збор за една од најголемите суперјахти во светот, долга 105 метри. Во неа има 8 луксузни кабини, огромна просторија за ВИП гости и слично.
Министерството за финансии го означи Керимов како член на групата руски олигарси кои профитираат од руската влада „преку корупција и криминални активности низ светот, вклучувајќи ја и окупацијата на Крим“.