Италија сепак ќе го пропушти второто Светско првенство по ред.
Во борбата за СП 2018 Шведска беше подобра од Италија, а сега ги сопре и Македонија.
Италијанците се надеваа дека ќе може да влезат во Мундијал наместо Иран. Иранската фудбалска федерација се најде во фокусот на ФИФА откако на последниот квалификациски натпревар против Либан во Машдад не им беше дозволен влез на жените на стадионот.
На социјалните мрежи се проширија снимки на кои се гледа дека полицијата употреби солзавец пред стадионот за да растера околу 2.000 жени кои уредно купиле билети за натпреварот и сакале да го следат настапот на нивната репрезентација. Иранците стравуваа од казна, а најдрастично би било исфрлањето од Светското првенство поради кршење на човековите права.
Сепак, Иран не е казнет, па јасно е дека Мундијалот ќе помине без Италијанците, актуелниот европски првак.
„Никогаш не сме разговарале да го исфрлиме Иран. Дури и да го направиме тоа, друга азиска репрезентација ќе оди на Светското првенство. Да се ослободиме од лудата идеја Италија да оди во Катар, тоа е невозможно. Тоа е утопија“, рече Евелин Кристилин, членка на Советот на ФИФА.