Горд сум на целиот медицински персонал, кој изминатиов период неуморно и целосно се вложи со натчовечки напори во спасувањето на човечки животи, напиша на Facebook министерот за здравство Венко Филипче.
„Тие се нашите херои и ја заслужуваат поддршката и почитта која им е потребна. Знам дека сите сме уморни, ковид кризата трае цела година, но не смееме да се откажеме“, порача министерот.
„Празниците сѐ пред нас, да продолжиме со почитување на мерките. Да не се групираме и да се грижиме за здравјето. Подобри денови ќе дојдат и повторно нормално ќе функционираме. Дотогаш: заштитна маска, физичка дистанца, негрупирање и често миење на рацете!“, апелира Филипче.
Покрај здравствените работници, еднократна парична награда ќе добијат и медицинските работници од Министерството за одбрана кои се вклучени во лекувањето на заболените од COVID-19.
Еднократна парична награда ќе добијат и вработените од Специјалниот Завод за лица со попреченост во Демир Капија кои во грижата за штитениците во заводот неколку недели беа вон своите домови, стои во објавата на министерот.