Франција нема да ја признае Каталонија доколку тој регион еднострано прогласи независност, изјави денес француската министерка за европски прашања, Натали Лоизо.
„Ако биде прогласена независност, тоа ќе биде еднострано и ние едноставно нема да ја признаеме Каталонија“, изјави министерката Лоизо на локалната телевизија.
Лоизо рече дека „Каталонија не може да биде дефинирана како држава преку гласање кое го организираше движењето за независност пред малку повеќе од една недела“ и дека „кризата треба да се решава преку дијалог и на сите нивоа на шпанската политика“.
Француската министерка исто така изјави дека избрзаното признавање на независност после едностраното одделување би претставувало отфрлање на одговорноста која ја има Франција.
Таа смета и дека ако Каталонија биде призната, автоматски би ја напуштила Европската Унија.