Да, Франција навистина има променето знаме и тоа во нијансата на сината боја, но до неодамна ретко кој успеа да ја примети разликата. Промената се случи со одлука на претседателот Емануел Макрон и беше објаснето зошто е тоа направено.
Пред Елисејската палата, каде што се наоѓа претседателската канцеларија, истакнато е знаме на кое сега сината боја е потемна. Таква нијанса на сина беше на знамето веднаш по Француската револуција (1789-1799).
Кабинетот на претседателот соопшти дека промената се случила во јули минатата година, но дека никој досега не ја забележал. Француската морнарица ја имаше задржано темносината боја уште од 18 век. Посветла нијанса на оваа боја почна да се користи во 70-тите години на минатиот век.
Радио Europe 1 денеска објави дека претседателот Макрон се одлучил за оваа промена по совет на соработниците Арно Жолан и Бруно Роже-Пети.
Според властите, темносината боја е поелегантна и поповрзана со Граѓанската, буржоаска револуција. Сепак, некои имаат различни теории за тоа зошто бојата се променила. Со оглед на тоа што ново-старата нијанса повеќе се разликува од сината боја на знамето на Европската Унија, некои се на мислење дека оваа промена јасно ја нагласува разликата меѓу Франција и Европската Унија. Но, властите уверуваат дека не се работи за „војна на бои“, пишува The Guardian.
Актуелното знаме всушност и се користеше како државно знаме прво од 1794 до 1815, а потоа од 1848 до 1976 година кога почна да се користи посветлата верзија, сѐ до минатата година.
Сината и црвена боја се традиционални бои на Париз кои и денес се користат на парискиот грб. Сината се поврзува со Свети Мартин Турски, додека црвената со Свети Денис (Сен Дени). Белата боја се сметала за традиционална француска боја и била нарекувана „античка француска боја“. Белата боја била додадена на револуционерните бои (црвена и сина) и се создало денешното знаме, познато како Французите како триколор.