Французите бираа најдобар напаѓач во домашната лига за изминатите 20 години, а приматот замина кај Дидје Дрогба на сметка на Златан Ибрахимовиќ.
Гласањето беше организирано од страна на Лиг 1 преку нивниот Twitter профил. Дрогба освои 51 процент од вкупно 40.094 гласови и во тесна битка го победи Ибра кој освои 49 отсто од гласовите.
Котиворијанецот настапуваше во Франција три сезони. Првите две ги мина во Генгам, додека последната, 2003/04 во Марсеј. Настапи на вкупно 80 натпревари на кои постигна 39 голови по што следуваше трансфер во Челси каде и се прослави.
„Wow какво признание од навивачите, благодарност до @EAGuingamp @OM_Officiel кои ми овозможија да ги доживеам овие неверојатни емоции. Почит за сите напаѓачи кои играле во француската лига“, твитна Дрогба.
За разлика од него, Ибрахимовиќ има далеку подобра статистика. Настапувајќи за ПСЖ од 2012 до 2016 постигна неверојатни 113 голови на 112 натпревара. Сепак, навивачите го претпочитаат поранешниот репрезентативец на Брегот на Слоновата Коска.
Гласањето беше нокаут систем со елиминации и тоа поделени на два дела: најдобри пред и по 2010. Во вториот дел Ибра претходно ги победи Марио Балотели, Алесандр Лаказет, Килјан Мбапе и Единсон Кавани, додека Дрогба во првиот дел собра повеќе гласови од Фернандо Мориентес, Александер Фрај, Карим Бензема и Паулета.
