Светски познатата пејачка Бритни Спирс работи на последните подготовки на својата биографија, а критичарите веќе предвидуваат дека книгата за нејзиниот живот ќе стане бестселер.
Како што пренесуваат странските медиуми, мемоарите на оваа поп-ѕвезда ќе бидат објавени во втората половина на годината, а издавачите ја опишаа книгата како инспиративен и револуционерен бестселер.
„Книгата на Бритни е приказна за триумф. Ќе ги опфати нејзините најчувствителни моменти, нејзиното детство и тоа дека била девојка со големи соништа, раскинувањето со Џастин Тимберлејк, моментот кога ја избричи главата и битката за старателство со нејзиното семејство“, рече извор близок до пејачката.
Се наведува дека тоа е и приказна за преживувањето, наоѓањето самостојност, мир и среќа со нејзиниот сопруг Сем Асгари.
Познато е дека Спирс соработувала со Сем Лански, познат автор и новинар кој пишувал за The Atlantic, New York Magazine, Time и правел профили на ѕвезди како Мадона, Ники Минаж и Адел.
Исто така, медиумот Page Six откри дека Бритни Спирс потпишала значаен договор за книгата во вредност од 15 милиони долари, што го склучиле Creative Artists Agency и нејзиниот адвокат Метју Розенгарт.