Познато е дека легендарниот Сер Алекс Фергусон бараше строга дисциплина од своите фудбалери, но Рајан Гигс открива дека четворица уживале посебен третман кај него.
Познати се неговите кавги со Дејвид Бекам, а сега Гигс откри кои фудбалери легендарниот шкотски стратег никогаш не ги чепкал.
„Прв беше Ерик Кантона. Имаше натпревари на кои тој ништо немаше да направи. Ни гол, ни асистенција, а ниту пак се трошеше да помага во одбрана како Карлос Тевес или Вејн Руни. Тогаш во соблекувална коментиравме како ќе го осети бесот на Фергусон, но ништо не се случуваше. Нареден натпревар Кантона ќе дадеше гол или ќе направеше некоја негова магија. Другите тројца беа Брајан Робсон, Рој Кин и Кристијано Роналдо. Големите ѕвезди Фергусон ги третираше на посебен начин бидејќи знаеше дека ќе му се оддолжат на терен“, вели Гигс.
За разлика од нив, Велшанецот на своја кожа го има осетено бесот на Фергусон.
„Бев во немилост неколку пати. Шест или седум пати бев казнуван поради расправии со него. Во тие моменти не ми беше сеедно, но после неколку години Сер Алекс ми рече дека посакувал некогаш да му вратев. Тоа ќе му покажело дека не сум бил рамнодушен“, заврши велшката легенда.
