Еден од најдобрите напаѓачи во светот, играчот на Манчестер Сити, Ерлинг Холанд (23), не е на нивото од минатата сезона, поради што неодамна беше мета на критики, пред сѐ од поранешните играчи кои денес ги анализираат натпреварите за ТВ куќите.
Какви стандарди постави Холанд минатата сезона најдобро покажува податокот дека оваа сеозна често го критикуваат, а тој има постигнато вкупно 32 гола (21 во Премиер лигата) на 40 настапи во сите натпреварувања.
Вредноста на Холанд за Манчестер Сити, со кого има договор до 2027 година, не е само на теренот, туку Норвежанецот е еден од најпопуларните фудбалери во светот, неговиот маркетиншки потенцијал е огромен, а тоа го покажува и веста дека ова недела Холанд станува лик што може да се игра во видео игрицата „Clash of Clans“.
Ова е прв пат во игрицата да се додаде вистинска личност, а Холанд ќе стане ликот на „Кралот на варварите“ во текот на месец мај.
Холанд ја игра „Clash of Clans“ повеќе од десет години и стапи во контакт со Supercell, финските програмери кои стојат зад популарната игрица, за да формираат партнерство.
„Кога слушнавме дека Ерлинг Холанд е обожавател на нашата игрица и сака да биде партнер со нас, тоа навистина беше сценарио од соништата“, изјави Стјуарт Мекгау, генерален директор на „Clash of Clans“.
Холанд имал 10 години кога прв пат ја открил оваа игрица, а активно учествува и денес.
„Јас сум голем обожавател на игрицата долго време и знам сè за неа, така што е навистина кул да се појавиш како лик во игрицата“, рече Холанд.
