Новата документарна минисерија Queen Cleopatra на Netflix наиде на критики од гледачите бидејќи египетската владетелка Клеопатра е претставена со темна боја на кожата.
Нараторка на серијата е Џејда Пинкет Смит, која исто така еден од извршните продуценти на проектот.
Queen Cleopatra е втората сезона од Netflix серијалот African Queens. Првата сезона го следеше животот на африканската кралица Нјинга од територијата на Ангола.
Во интервју за Netflix, Пинкет Смит рече: „Овој проект помина низ многу промени, но се започна со Вилоу... Не често ги слушаме приказните за црните владетелки. Тоа беше важно за мене, за ќерка ми и нашата заедница да ги научи овие приказни бидејќи ги има многу. Тажно е што немаме пристап до овие историски личности кои беа камен-темелник на африканските земји“.
Иако повеќето историчари се согласуваат дека Клеопатра била бела затоа што потекнувала од Птоломејската династија, и дека таа династија била позната по практикувањето инцест, Клеопатра во серијата ја игра актерката Адел Џејмс. Бидејќи не го знаеме целосно потеклото на мајката или бабата на Клеопатра, Netflix одлучи да ѝ ја додели улогата на актерка со темна кожа и да покаже страна од историјата што вообичаено не ја гледаме.
Поради ова, Netflix беше мета на бројни критики. Еден корисник на Twitter напиша: „Кражбата на египетската историја продолжува. Американските ревизионисти одлучија дека грчко-египетската кралица Клеопатра била црна“. Многу египетски корисници го делат ова мислење.
Документарната серија ќе биде објавена на 10 мај и ќе има четири епизоди.
