Кошаркарите на Торонто Репторс последни изборија пласман во четвртфиналето во плејофот во НБА лигата. Репторси, во седмиот натпревар ја совладаа Индијана со 89:84 и во наредната рунда ќе играат против Мајами. На Западот Голден Стејт и без Стеф Кари, во првиот меч од втората рунда, лесно се справи со Портланд 118:106.
Торонто по 15 години ја мина првата рунда во плејофот, во 2001 година Репторси славеа над Њујорк 3-2, а во 2016 ја елиминираа Индијана со 4-3.
Демар Дерозан постигна 30 поени, а Јонас Валанчунас имаше учинок од 10 поени и 15 скокови. Индијана ја предводеше Пол Џорџ со 26 поени и 12 скокови.
Торонто во полуфиналето на Источната конференција ќе игра против екипата на Мајами, која, исто така, во седум натпревари го елиминираше Шарлот.
На Западот, Голден Стејт и Портланд ја започнаа својата полуфинална серија. Без Стеф Кари, актуелните шампиони лесно го победија Портланд 118:106. Отсутниот Кари го замени Клеј Томпсон кој постигна 37 поени (7/14 за три), додека Дрејмонд Грин го забележа 14 „трипл-дабл“ во сезоната (23 поени, 13 скокови, 11 асистенции).
Вториот меч се игра повторно во Оукленд на 3 мај, а Портланд ќе биде домаќин на 7 и 9 мај кога се очекува во тимот на Голден Стејт враќањето на Стеф Кари.
