Аргентинскиот голман Емилиано Мартинес беше еден од хероите на „Албиселесте“ на Мундијалот во Катар, а по освојувањето на златниот пехар голманот на Астон Вила го истетовира истиот.
Мартинес објави фотографија од тетоважата на Instagram и му се заблагодари на тату мајсторот за добро завршената работа.
„Ти благодарам Хуан Пабло Скунка што ми го истетовира ова чудо“, напиша Мартинес на стори, со што стана вториот аргентински репрезентативец кој ја истетовира Божицата на ФИФА, откако Анхел Ди Мариа го направи тоа пред него.
Тетоважата на Мартинес го покажува трофејот над кој се наоѓаат три ѕвезди кои го претставуваат секој од мундијалските триумфи на Аргентина, со фразата „Нека страста те води до славата“ напишана под пехарот.
Да потсетиме, Мартинес беше прогласен за најдобар голман на Светското првенство во Катар, а во центарот на вниманието се најде и поради недоличното однесување на доделувањето на наградите и за време на големото славје на Аргентинците.