По најтоплиот јуни забележан досега во Финска и некои делови на Шведска, температурите во северниот дел на Европа вчера се приближија на апсолутните рекорди, а термометарот покажа помеѓу 30 и 35 степени Целзиусови.
Во градот Кево, на самиот север на Финска, измерени се рекордни 33,5 степени, што е највисока температура забележана во тој дел од земјата по рекордни 34,7 степени забележани во 1914 година, пренесува агенцијата STT.
На национално ниво, јуни беше најтоплиот месец досега забележан од почетокот на мерењата во 1844 година, со просечна температура од 16,5 степени, што го надмина рекордот од 1950-тите, според податоците на Националниот метеоролошки институт. Во соседна Шведска, јуни повторно беше најтопол досега забележан во Стокхолм (19,3 степени во просек), повеќе од рекордот во 2018 година, а потоа и во 2019 година.
„Јуни 2021 беше најжешкиот јуни забележан досега во мојот роден град Стокхолм и тоа со огромна разлика. Вториот најжежок јуни беше во 2020. Третиот во 2019. Дали забележувам тренд? Сигурно пак е случајност“, порача шведската активистка за заштита на животната средина и поборник протв климатските промени, Грета Тунберг.
Во Норвешка, Метеоролошкиот институт вчера измери 34 степени во Салтдал, област во близина на Арктичкиот Круг, што е највисока температура измерена во целата земја оваа година. Тоа е 1,6 степени помалку од апсолутниот рекорд на земјата. Тропски ноќи се забележани на повеќе места во кралството, кога температурата не паѓа под 20 степени.
Летото 2021 година веќе претставува апсолутен рекорд на топлина во Канада, каде што температурите се приближуваат до 50 степени Целзиусови под сенка, под дејство на топлинска купола. Според извештајот објавен во мај, Арктикот се загрева трипати побрзо во споредба со целата планета.