Имуниот систем на некои луѓе кои немале коронавирус сепак има некој вид препознавање на патогенот, покажува ново истражување објавено во Nature.
Студијата откри дека меѓу 68 здрави испитаници во Германија, кои никогаш не го прележале новиот коронавирус, 35 проценти од нив имаат Т-клетки во крвта кои се реактивни на вирусот, пренесе CNN.
Т-клетките се дел од имунитетот и ни помагаат во заштитата од инфекции. Реактивноста на Т-клетките укажува дека имуниот систем можеби претходно имал искуство во борба со слична инфекција и дека тоа може да го искористи во борбата против новата инфекција.
Како имунитетот на овие испитаници може да има реактивни Т-клетки ако никогаш не прележале COVID-19?
Тие се веројатно стекнати во претходни ендемски инфекции на други видови коронавируси, стои во студијата на истражувачите од различни институции во Германија и Велика Британија. Употребата на оваа меморија на Т-клетките со друга слична инфекција во одговор на нова инфекција се нарекува „вкрстена реактивност“.
Во новата студија била вклучена анализа на примероци од крвта на 18 пациент со COVID-19, на возраст од 21 до 81 година, како и здрави пациенти на возраст од 20 до 64 години. Откриено е дека Т-клетките се реактивни на коронавирусот кај 83 проценти од пациентите со COVID-19.
Сепак, многу експерти сметаат дека овие резултатите треба да се истражат поопширно. Меѓу нив е и д-р Амеш Адалџа од Центарот за здравствена заштита на Универзитетот Џон Хопкинс, кој не беше вклучен во ова истражување.
Тој вели дека од истражувањето е јасно дека присуството на Т-клетките не спречува да се заразиме, но можеби може да ја регулира тежината на инфекцијата.
Друг експерт, д-р Вилијам Шафнер од Медицинскиот факултет на Универзитетот Вандербилт во Нешвил, смета дека Т-клетките не треба да ги занемариме.
Тој воопшто не е изненаден за вкрстената реактивност на Т-клетките кај учесниците кои немале SARS-CoV-2.
„SARS-CoV-2 е седмиот човечки коронавирус кој е откриен. Четири видови коронавируси кружат низ заедницата и се одговорни за 25 проценти од вообичаените настинки. Скоро секоја личност на светот имала некаква искуство со некој од тие коронавируси, а тие се од исто семејство по што се развива некој вид вкрстен реактивен имунитет“, објаснува тој.
Ова не е единствената студија која покажала дека постои одредено ниво на имунитет кај некои луѓе на новиот коронавирус.