Филмот „Joker“ на режисерот Тод Филипс е еден од најконтроверзните филмови во изминативе години.
Додека критичарите едногласно го фалат, публиката е поделена во мислењата за филмот за Џокерот со Хоакин Феникс во главната улога.
Или го мразите, или го обожавате, нема средина. Во секој случај, контроверзите помагаат за успехот на филмот на киноблагајните.
„Joker“ го сруши рекордот и стана филм од R категорија со најголема заработка во кината откако почна да се прикажува на 3 октомври.
Досега од продажба на влезници има заработено 788 милиони долари. Досегашниот рекорд го држеше „Deadpool“ од 2016 година со заработка од 783 милиони долари на киноблагајните.
Иако филмот наиде на критики дека го глорифицира насилството, тоа не ги спречи луѓето да се уверат во тоа со свои очи и ги преплавија киносалите ширум светот.
Критичарите, пак, се „обединети“ во пофалбите за изведбата на Феникс и режисерските решенија на Филипс и му предвидуваат голем успех во следната сезона на филмски награди, вклучувајќи ги и Оскарите.
