Џани Инфантино, претседател на Меѓународната фудбалска организација (ФИФА), го поддржа играчот на Реал Мадрид, Винисиус Жуниор и го осуди новиот чин на расизам против бразилскиот репрезентативец.
„Изразувам целосна солидарност со Винисиус. Нема место за расизам ниту во фудбалот, ниту во општеството, а ФИФА цврсто стои на страната на сите играчи кои ќе се најдат во таква ситуација“, изјави Инфантино.
Винисиус се соочи со дополнителни расистички напади за време на гостувањето на Реал Мадрид кај Валенсија викендов, што беше само продолжение на непријатните ситуации во кои често се наоѓа Бразилецот во текот на актуелната сезона. Неколку хулигани од други шпански прволигаши и претходно расистички го напаѓале Винисиус Жуниор.
„Би сакал во тие моменти да се почитува протоколот на ФИФА. Прво прекинете го натпреварот. Потоа фудбалерите нека го напуштат теренот и главниот најавувач на стадионот да најави дека натпреварот ќе биде прекинат доколку продолжат расистичките напади. Потоа натпреварот нека продолжи и доколку се повторат нападите, судијата дефинитивно да го прекине натпреварот, а три бода да добие противничкиот тим“, додаде Инфантино.