Докторката Добринка Наунова-Јовановска и главната медицинска сестра Габриела Темелковска од Клиниката за инфективни болести, кои денеска први ја примија вакцината против COVID-19 во државава, изјавија дека се чувствуваат одлично и препорачаа секој да се вакцинира.
„Јас ја примив вакцината, се чувствувам одлично. Самото аплицирање на вакцината е безболно и можам да препорачам секој од нас кој е во оваа држава да прими вакцина, по сопствен избор нормално, кој сака Pfizer, кој сака некој друг тип вакцина. Тоа е единствен начин да се заштитиме од овој тип на инфекција што се случува последнава година, со која цел свет се бори, па и ние. Втората доза се прима на дваесет и првиот ден, и тоа е закажан термин кога треба да ја примам втората доза. Имунитетот се стекнува веќе за две до три недели, се постигнуваат заштитни антитела. Тоа е индивидуално, би требало да се постигне тој имунитет. Ќе се чувствувам посигурна, во однос на тоа ако случајно дојдам во контакт со некој кој е инфициран, мислам дека многу полесно ќе се справам со таа инфекција“, рече инфектологот Наунова Јовановска.
„За мене, посочи таа, ќе биде една голема сигурност тоа што сум примила вакцина и веројатно ќе бидам заштитена многу повеќе од оние што не примиле вакцина. Индивидуално е кој колку ќе развие антитела и со каков тип на имунитет ќе одговори, меѓутоа воглавно 95 отсто е заштитната моќ на оваа вакцина и јас се надевам дека ќе бидам во тие 95 отсто заштитени, и тоа е она што дава некоја сигурност за понатаму“, додаде д-р Наунова Јовановска.
Главната медицинска сестра на Инфективната клиника, Темелковска изјави дека ја примила вакцината и се чувствува одлично.
„Ги поканувам сите да се пријават да се вакцинираат. Секако дека се чувствуваме посигурни, со вакцинацијата ќе се намали и бројот на новозаболени и ќе почнеме да се враќаме во нормален живот“, додаде Темелковска.
