Меѓународниот аеродром на вториот најголем ирачки град Мосул е ослободен од терористите на ИСИС, објави BBC. По 4-часовната жестока битка која почна утрово, ирачката војска потпомогната од американските сили успеа да ги победи борците на Исламската држава.
„Можеме да потврдиме дека аеродромот во Мосул е ослободен и дека за кратко време ќе имаме целосна контрола над објектот“ - изјави Сабах ал Нуман, портпаролот на антитерористичката единица на ирачката војска.
Западните делови на градот се уште се под контрола на ИСИС, додека источниот дел е ослободен. Аеродромот и воената база покрај него сега ќе се користат за офанзивата за ослободување на западен Мосул каде што има голем број цивили.
Воените дејствија за ослободување на Мосул ги прават војската на Ирак и курдските сили, а двете армии од почетокот на офанзивата имаат голем број на жртви од околу 6.000 војници. Кај ИСИС бројките се помали и тие имаат околу 3.000 загинати милитанти.