Кошаркарите на ТФТ синоќа го освоија првиот трофеј во клупската историја, откако триумфираа во финалето на македонскиот Куп Благоја Георгиевски - Буштур над бранителот на титулата МЗТ со 80:66 (41:37).
Во 28. кошаркарско финале, кое се одигра во СРЦ „Кале“, ТФТ доминираше над градскиот ривал во текот на целиот натпревар и заслужено дојде до трофејот во својот дебитантки настап во финалето на ова натпреварување.
ТФТ е деветтиот освојувач на кошаркарскиот куп во кој МЗТ Скопје остана на 10 трофеи, колку што има и Работнички.
Најефикасен во редовите на ТФТ и на натпреварот беше Американецот Ландриус Хортон со 23 поени, а забележителен настап имаше и неговиот сонародник Амир Смит, кој оствари дабл-дабл ефект со 12 поени и 17 скокови, а беше прогласен и за најкорисен играч на завршниот турнир.
Досегашни победници:
10 - Работнички (1993, 1994, 1998, 2003, 2004, 2005, 2006, 2011, 2015, 2019)
10 - МЗТ (1996, 1997, 1999, 2000, 2012, 2013, 2014, 2016, 2018, 2021)
2 - Еуро Никел (2008, 2010)
2 - Гостивар (2001, 2002)
1 - Вардар (2007)
1 - Кочани Деликатес (1995)
1 - Карпош Соколи (2017)
1 - Амак СП (2009)
1 - ТФТ (2022)
