Утрово еден маж побарал помош од неколку лица кои седеле кај фонтаната во Градски парк, затоа што бил повреден во грбот.
Според МВР, околу 02.38 часот изутрина Т.В. пријавила дека кај фонтаната во Градскиот парк им пришло непознато машко лице кое побарало да му повикаат Итна медицинска помош, бидејќи бил повреден во грбот и многу крварел. Тој изјавил дека бил нападнат од три непознати лица.
По преземени мерки било утврдено дека повреденото лице е И.М. (22) од Скопје. Тој бил префрлен во Ургентен центар „Мајка Тереза“, каде му се констатирани тешки телесни повреди (осум убоди од остар предмет во пределот на грбот).
Се преземаат мерки за пронаоѓање на сторителите и за целосно расчистување на случајот.