Со два брзи гола во второто полувреме тимот на Јувентус му се одмазди на Лацио за поразот од зимата и дојде на само чекор од заверување на титулата.
Мируваа мрежите во првиот дел кој го одбележаа малку шанси на двете страни од кои најдобра беше онаа на Чиро Имобиле кој со одличен удар ја затресе рамката од голот на Војчех Шченсни погодувајќи ја стативата. Претходно на спротивната страна и Алекс Сандру со глава ја погоди стативата.
Неколку минути по почетокот на вториот дел и сомнителен пенал за Јувентус. Пауло Дибала упати удар, а на работ од шестнаесетникот при обидот на блокира со рака играше Бразилецот Бастус. Главниот судија Даниеле Орсато прво покажа слободен удар, а потоа по интервенција на луѓето од ВАР собата одлуката ја преиначи во пенал. Томас Стракоша го прочита, но ударот на Кристијано Роналдо беше прецизен и заврши во мрежата.
Само три минути по водечкиот гол, катастрофална грешка на Луис Фелипе на средината на теренот кој дозволи Дибала да му ја украде топката. Во контра, Дибала му сервираше на Португалецот на празен гол за 2:0.
Потоа Роналдо имаше одлична шанса за хет-трик, но неговиот удар со глава заврши во пречката.
Во 83. минута пенал доби и Лацио откако Леонардо Бонучи буквално го рогна Имобиле. Истиот играч успешно реализираше од белата точка за 2:1.
Јувентус со оваа победа му се одмазди на Лацио за поразот од 3:1 на „Олимпико“ од 22 декември 2019 во првиот дел од сезоната.
По комплетирањето на ова 34. коло Јувентус сега води со 80 бодови, 8 повеќе од Интер, 9 од Аталанта и 11 од Лацио. Со уште 12 бода во игра, Јуве уште во наредното коло може да ја завери титулата, нормално, доколку киксираат и конкурентите.
