Јужнокорејскиот суд донесе значајна одлука со која за првпат се признаваат правата на истополовите парови, а активистите ја поздравија пресудата како голема победа за правата на ЛГБТК+ луѓето во земјата.
Случајот, кој сега ќе оди пред Врховниот суд, го поднесоа геј парот Со Сеонг-вук и Ким Јонг-мин, кои живеат заедно и одржаа свадбена церемонија во 2019 година.
Меѓутоа, таквата церемонија нема правна важност бидејќи Јужна Кореја не ги признава истополовите бракови.
Во 2021 година, Со ја тужеше Националната служба за здравствено осигурување (NHIS) за укинување на бенефициите за неговиот партнер кого го регистрирал како издржувано лице, откако станало јасно дека тие се геј пар.
Понискиот суд пресуди во корист на NHIS минатата година, но во значителен пресврт на случајот, Високиот суд во Сеул ја поништи таа одлука, практично наложувајќи му на давателот на осигурувањето да ги пренесе придобивките на партнерот на Со како издржувано лице.
„Иако Јужна Кореја има уште долг пат за да стави крај на дискриминацијата, оваа пресуда дава надеж дека може да се надминат предрасудите“, беа пораките по објавувањето на пресудата.
Иако земјата не ги признава истополовите бракови, геј врските не се криминализирани, но ЛГБТК+ луѓето главно живеат под радарот.
Активистите долго време ја нагласуваат потребата од закони против дискриминација врз основа на сексуална ориентација.
Многу дискутираниот закон за антидискриминација се чека во јужнокорејскиот парламент со години поради недостиг на консензус меѓу пратениците.