Лидерот на полската владејачка десничарска партија Право и правда (PiS), Јарослав Качињски, ја обвини Германија дека сака да доминира во Европа.
Денеска Германците сакаат по мирен пат да го постигнат она што некогаш сакаа да го постигнат со воена сила, изјави вчера Качињски во градот Легница на југот на Полска.
Но, силата на Европа лежи во различноста и суверенитетот на земјите-членки, рече тој, додавајќи дека верува дека „ситуацијата во која втората по големина земја во ЕУ сака да доминира во Европа е пат кон криза и катастрофа“.
Качињски (73) нема никаква функција во владата, но важи за влијателен играч во полската политика.
Полска следната есен избира нов парламент, а рејтингот на актуелната влада на PiS неодамна падна поради високата инфлација. Во своите говори низ јужниот полски округ Долна Шлезија, Качињски веројатно се обидува да ги придобие гласачите со антигерманска реторика.
