На Исланд, заклучно со минатата недела, закрепнаа околу 97% од заразените со коронавирусот, а се појавија само два нови случаи во седум дена, па изгледа дека заразата во земјата е скоро целосно елиминирана, соопшти Владата на Исланд.
Првите случаи на COVID-19 беа пријавени на почетокот на март, а Исланд веднаш воведе строги ограничувања во движењето и во активностите. Ги затвори училиштата, забрани поголеми јавни собири и воведе строги тестирања и стратегија на следење на контактите и движењето, за да запре ширењето на вирусот.
Тоа овозможи да земјата со околу 360.000 жители кон средината на април објави делумно отворање бидејќи епидемијата порано го достигна врвот и почна да се намалува бројот на заразени.
„Пријатно се изненадивме со големата брзина на намалувањето на епидемијата во Исланд. Но, исклучително е важно да останеме внимателни и да ја минимализираме опасноста од појава на заразата“, изјави главниот епидемиолог Торолфур Гуднасон.
Во Исланд се тестирани 51.663 жители, односно повеќе од 15% од населението. Повеќето мерки се ублажени од понеделникот.
Отворени се училиштата, фризерските салони и дозволени се собири до 50 луѓе.
„Околу 57% од оние кои беа позитивни на тестирањето веќе беа изолирани во карантин кога им беше дијагностицирана болеста, што верувам дека ја потврдува ефикасноста на тие мерки против ширењето на вирусот“, соопшти владата.
Правилото за држење оддалеченост од два метри меѓу луѓето сè уште е на сила, а теретаните и базените ќе останат затворени.
На Исланд 1.799 луѓе беа позитивни на вирусот, а 1.750 закрепнаа. Сега има 39 активни случаи, тројца се хоспитализирани. Како последици од коронавирусот починаа 10 луѓе, од нив седуммина беа постари од 70 години.