Ново истражување објавено во JAMA Neurology тврди дека консумирањето ултра преработена храна го зголемува ризикот од деменција.
Ултра преработената храна како замрзната пица и готови јадења го олеснуваат нашиот брз ритам на живот, но освен што ни заштедува време, оваа храна е и прилично вкусна.
Но, ако над 20% од дневното внесување калории се состои од ваква храна, го зголемувате ризикот од когнитивен пад, покажа ново истражување.
Оваа количина би изнесувала околу 400 калории дневно во исхрана од 2.000 калории на ден. Студијата покажа дека дел од мозокот, вклучен во извршното функционирање – способност за обработка на информации и носење одлуки, е особено погоден.
Мажите и жените во студијата кои јаделе најмногу преработена храна имале 25% побрз процент на пад на извршните функции и 28% побрз степен на вкупното когнитивно оштетување.
„Иако оваа студија не е осмислена да ги докаже причините и последиците, постојат низа елементи кои ја потврдуваат претпоставката дека одредено забрзано когнитивно пропаѓање може да се припише на ултра преработената храна“, вели д-р Давид Кац за CNN.
Во студијата учествувале над 10.000 Бразилци во период до 10 години. Над половина од нив биле жени, на просечна возраст од 51 година. Освен когнитивно влијание, преработената храна го зголемува ризикот од дебелина, проблеми со срцето и циркулацијата, дијабетес, канцер и пократок животен век.
