Манчестер Јунајтед вчера го раскина договорот со Кристијано Роналдо. Оваа вест силно одекна во фудбалскиот свет, но никого не изненади премногу. Да потсетиме, Португалецот се врати во Јунајтед во летото 2021 година од Јувентус со отштета од 17 милиони евра.
Иако сè уште беше на својот врв во постигнувањето голови, набрзо почнаа проблемите. Веднаш по неговото пристигнување, медиумите, познавачите и навивачите го критикуваа поради неангажманот во играта, особено во дефанзивната фаза. Сето тоа кулминираше со лошата сезона на Јунајтед, која беше катализатор за големи проблеми меѓу клубот и неговата најголема ѕвезда.
Роналдо и во Јунајтед покажа дека може да биде незапирлива машина. За жал за тимот, ова важеше само за бројот на голови, додека неговиот креативен резултат и одбранбените напори беа на најниско ниво откако припаѓа на светот на најголемите светски ѕвезди.
Португалецот постигна 18 гола во Премиер лигата, но во сите други фази од играта беше играч помалку за Јунајтед, што го потврди со ужасната сезона. Јунајтед беше елиминиран во првото коло од ФА Купот, второто коло од Лига купот, осминафиналето на Лигата на шампионите, а беше само шести во првенството. Тоа значеше дека Роналдо нема да игра во Лигата на шампионите доколку остане во Јунајтед, а во новогодишната честитка веќе ги прозва клубот и соиграчите.
Дека станува сè понервозен најдобро покажа ситуацијата во април годинава. Лут на поразот на својот тим на „Гудисон парк“, Португалецот му го скрши мобилниот телефон на 14-годишното аутистично момче Џејкоб, кој ги снимаше играчите, на пат кон соблекувалната.
Поради ова, тој бил под истрага на полицијата, мајката на аутистичното момче се огласила и рекла дека нејзиното дете после тој настан имало психички проблеми, а неговиот имиџ во јавноста незапирливо почна да тоне. Тоа беше само подготовка за тоа што ќе се случува во тековната сезона.
Во Јунајтед пристигна нов тренер, Холанѓанецот Ерик тен Хаг, а Роналдо брзо се судри со него. Поголемиот дел од подготвителните натпревари ги мина на клупата за резерви, а во два наврати веднаш откако тренерот го извади од игра го напушти стадионот и не го дочека крајот на натпреварот и средбата со соиграчите потоа.
Неколку англиски медиуми на крајот од сезоната пишуваа дека тој ќе бара трансфер бидејќи сака да игра во Лигата на шампионите. Во меѓувреме Јунајтед се издигна во играта, но најмногу без Роналдо во составот, кој повеќе не беше ниту пред голот.
SkySports објави одлична анализа која прецизно покажа дека Манчестер Јунајтед е многу подобар тим без Роналдо, а нервозата кај Португалецот растеше сè повеќе. Својот врв го достигна непосредно пред Светското првенство.
Сè кулминираше со сега култното интервју со Пирс Морган, во кое Роналдо се нафрли на Манчестер Јунајтед, сегашните и поранешните соиграчи. Беше јасно дека тоа е точката од која нема враќање.
„Навистина мислев дека сè ќе се смени по 13 години. Бев негативно изненаден. Сè остана исто. Исто така, на младите играчи не им е гајле. Манчестер Јунајтед нема никаков напредок. Реал Мадрид и Јувентус ги следеа најновите трендови во технологијата и инфраструктурата.
Тие секогаш се обидуваа да се подобрат, дури и во однос на тренинзите, исхраната и деталите за тоа како најдобро да се опорават по натпреварите. Јунајтед денес заостанува зад тие клубови“, рече меѓу другото Португалецот во едно од најконтроверзните интервјуа во модерната фудбалска историја.