Летото е пред нас и наскоро ќе почнеме да ги користиме клима уредите. Меѓутоа, пред да почнеме да ги користиме оваа сезона, треба да го направиме следново.
Воздухот од клима уредите може да содржи микроорганизми кои предизвикуваат разни заболувања како миокардитис (воспаление на срцевиот мускул), алергиски тегоби, ринитис, конјуктивитис, воспаление на белите дробови и увото, респираторни проблеми…
Клима уредите се поопасни во лето, кога ги вклучуваме да се разладиме, отколку во месеците кога со нив ги загреваме просториите, бидејќи топлиот и сув воздух ги убива повеќето бактерии и вируси.
Клима уредот треба да го исчистите најмалку еднаш годишно, а за оваа услуга овластените сервсии ќе ви наплатат околу 1.200 денари.
Тие ќе ја проверат и исправноста на климата и ќе ги исчистат внатрешната и надворешната единица.
Во случај да се одлучите за варијанта „сам свој мајстор”, потребно е да го направите следново:
- Прво, исклучете ја климата од струја.
- Подигнете го капакот од внатрешната единица и извадете ги филтрите (кои изгледаат како пластична мрежа) кои ќе ги исперете со топла вода и некое средство за дезинфекција, а потоа целосно исушете ги.
- Внатрешната единица може и да ја исчистите со правосмукалка, но со додаток кој има четка и е предвиден за прашина.
- Отворената внатрешна единица може да ја напрскате со средство за дезинфекција и потоа оставете го да делува неколку минути, а потоа избришете го со сува крпа.
Ваквото чистење би требало да го правите најмалку еднаш месечно или секоја втора недела, доколку клима уредот го користите често.