Во Грција, Турција, Албанија, Русија, Италија и во Македонија и понатаму беснеат шумски пожари. Најдраматична е ситуацијата во Грција, каде огнената стихија одзеде повеќе човечки животи.
Во последните 30 години ова се најлошите пожари во Грција. Две лица настрадаа, а 20 се повредени, додека во повеќе региони е прогласена кризна состојба. Пожарникарите во Грција се борат со над 150 шумски пожари. Меѓу првите жртви е пожарникар-волонтер.
Најтешко е во населбите околу Атина, каде се води борба за секоја куќа. Силните ветрови и екстремно топлото време ги отежнуваат напорите на ангажираните 700 пожарникари, локални жители и засилувањето од Кипар, Франција и од Украина. Евакуирани се илјадници луѓе, уништени се домови, автомобили, фабрики.
Стотина луѓе ги напуштија домовите на островот Евија. Гори и Пелопонез.
„Ангажираме сè што можеме во гаснењето на пожарите кои брзо се шират. Сите запалени подрачја повторно ќе бидат пошумени. Владата ќе ја промени политиката за заштита од пожари и поплави“, изјави грчкиот премиер Кирјакос Мицотакис.
Во Турција се евакуирани повеќе од 36.000 луѓе. На југот на земјата пожарникарите контролираат околу 20 пожари, но и понатаму има 12 жаришта на брегот на Средоземното и Егејското Море. Настрадаа 8 лица, а илјадници ги напуштија домовите.
Повеќе од три милиони хектари шума изгоре во 250 шумски пожари во Русија, нешто што не е забележано во последните 100 години. Во Сибир се евакуирани неколку села.
Пожари беснеат и на југот на Италија, каде се активни стотина пожари, поточно на Сицилија и Калабрија. Сицилија прогласи шестмесечна вонредна состојба поради пожарите.