Неидентификувани лица од надлежните органи во една европска земја ги украле QR кодовите што се користат за генерирање на европскиот зелен пасош, јавија италијанските медиуми.
Според нив, дел од QR кодовите биле објавени и дистрибуирани на интернет програми за издавање лажни сертификати. Според квалификувани италијански извори, веќе е одлучено да се поништат сите документи генерирани со тие QR кодови.
Планирани се и серија состаноци на европско ниво меѓу сите технички засегнати страни за детална анализа на ситуацијата. Сè уште не е познат бројот на украдени кодови или дали проблемот ја засега и Италија, иако истрагата е во тек.
Кражбата на кодовите не била извршена во Италија. Првичните истраги покажаа дека немало компјутерски напади врз Sogei, ИТ компанија на Министерството за економија што обезбедува кодови за генерирање зелени сертификати во Италија.
Според тоа, можеби нападот бил извршен врз слична институција во друга европска земја. Во моментов, сепак, потврдено е дека украдените QR кодови се поништени и како резултат на тоа, сите зелени сертификати генерирани од тие кодови се невалидни.
Повикувајќи се на извори од Италија, АНСА наведува дека тие укажуваат дека овие шифри се користат за создавање фалсификувани сертификати кои се нудат преку интернет.
Два зелени пасоша издадени на име на Адолф Хитлер, за кои е докажано дека се оригинални, сега кружат на мрежите. Според италијанскиот сајт Zezone.it станува збор за два зелени пасоши по име Адолф Хитлер, од кои едниот е роден во 1900 година, а другиот во 1930 година.
И двата имаат валиден QR код, а сајтот тврди дека овие шифри се украдени во Полска.
Истрагата е во тек, а се одржани многу состаноци на повеќе нивоа во ЕУ. Инаку, во Италија од 15 октомври за пристап до работното место е потребен и зелен пасош, односно ковид пропусница.