Најмалку едно лице загина, а 30 се повредени, од кои некои многу потешко, кога рано утринава во Холандија патнички воз со околу 50 патници излета од шините.
Возот излетал од шините откако удрил во градежен кран на пругата, соопшти холандската служба за итни случаи.
Спасувачките екипи се на местото на несреќата во Воршотен, село во близина на Хаг, соопштија холандските власти, пренесува Ројтерс.
Од пожарната и итната помош за холандското радио изјавиле дека 19 лица се пренесени во болница, а на останатите им била укажана помош на лице место.
Првиот вагон на ноќниот воз од градот Лајден за Хаг излета од шините по судирот и излета во поле, јави холандската новинска агенција АНП.
Според информациите, вториот вагон се превртел на страна, а во последниот вагон избувнал пожар, но тој брзо бил изгаснат.
Холандските железници објавија на Твитер дека возовите меѓу Лајден и делови од Хаг се откажани поради несреќата.
