Лидерот на Северна Кореја, Ким Џонг Ун, предупреди дека земјата може превентивно да употреби нуклеарно оружје доколку биде загрозена.
Според државната новинска агенција КЦНА, Ким изразил цврста волја да продолжи со развивање нуклеарно оружје за да може земјата, доколку е потребно, „превентивно и темелно да ги осуети сите опасни и заканувачки потези, вклучително и сите ескалирачки нуклеарни закани од непријателските сили“.
Ким ги пофали најзначајните воени претставници и нивната работа во текот на воената парада во понеделникот, кога земјата го покажа целиот нуклеарен арсенал, вклучително и интерконтиненталните балистички ракети кои потенцијално би можеле да стигнат до САД.
Беа прикажани и низа ракети на цврсто гориво со пократок домет кои се лансираат од копнени возила или подморници, а кои претставуваат закана за Јужна Кореја и Јапонија.
Обраќајќи се на илјадниците војници и присутни лица на парадата, Ким вети дека „ќе развие нуклеарни сили со најголема можна брзина“ и се закани дека ќе го употреби оружјето, ако биде провоциран. Изјави дека неговото нуклеарно оружје никогаш нема да биде ограничено на една мисија, а тоа е одвраќање од војна.
