Два града во североисточна Кина воведоа строги рестрикции за патување и привремено се затворија откако се појави нов кластер на заразени со коронавирусот.
Во Кина стравуваат од повторување на епидемијата, односно појавување на нов бран и тоа прилично брзо откако конечно излегоа на крај со првиот.
Вухан, епицентарот на појавата на вирусот, пријави барем петмина заразени кои не се поврзани еден со друг и крена паника дека Кина не е комплетно исчистена од COVID-19.
Сега во североисточниот град Џилин се појавија шест новозаразени пациенти од кои петмина се поврзани со заразен од соседниот град Шулан. Џилин е град со 4,5 милиони жители.
„За да го спречиме ширењето на заразата во епидемија моравме да воведеме строги мерки во урбанизираниот дел на Џилин“, вели заменик-градоначалникот на грдаот, Гаи Донпин.
Во соседниот Шулан, град со над 700 илјади жители, има 14 потврдени новозаразени по што состојбата во градот се врати на високоризична. Ова се случува само недела дена откако властите во Пекинг објавија дека секој регион во Кина може да ја спушти состојбата на нискоризична.
Засега Шулан е единствениот град каде важат строги рестрикции во однос на нормалниот живот, а на жителите им е наредено да останат дома.
Двата града се блиску до границата со Северна Кореја и Русија и поради тоа ги стропираа сите возови, за да се спречи евентуален увоз или извоз на вирусот.
„Ние сега се наоѓаме во „воена“ состојба“, рече градоначалникот на Шулан, Џин Хуа.