Научници во Кина развија маска што може да го детектира коронавирусот или вируси на грип во воздухот, како и да ги предупреди оние кои ја носат ако се изложени на вируси по 10-минутен разговор со заразено лице.
Сензорите прицврстени за маската можат да реагираат на само 0,3 микролитри вируси во воздухот, откривајќи го вирусот SARS-Cov-2 што предизвикува болест COVID-19 и вирусите на грип H5H1 и H1N1 во воздухот, во рок од 10 минути.
Студијата, предводена од шест научници е објавена во научното списание Matter на 19 септември.
Новиот уред, кој се монтира надвор од маската, опремен со литиумска батерија што се полни, е тестиран со прскање патогени во затворен простор со што е симулирано реално сценарио во кое некој зборува или кашла.
Сензорите реагирале на течноста во количина од 70 до 560 пати помала од онаа што настанува со кивање, испраќајќи предупредување на безжични уреди како телефони.
Долгогодишната пандемија поттикна масовно носење маски, но ублажувањето на мерките поврзани со COVID-19 во многу земји доведе до пад на употребата на маски. Сепак, носењето маски и понатаму е широко распространето во некои земји, меѓу кои и Кина која се држи строго до нулта-ковид политика.
Многу луѓе продолжија да носат маски за да се заштитат од вируси, без оглед на официјалните препораки.