Германскиот стратег открива дека имал чувство како да се видел со папата кога првпат го запознал легендарниот Сер Алекс Фергусон.
Предводникот на Ливерпул синоќа го доби признанието за Тренер на годината во Премиер лигата изгласан од Асоцијацијата на тренери. Тоа го заслужи откако на „Црвените“ им ја донесе првата титула по пауза од 30 години.
„Навистина премногу сум среќен штом сум именуван за тренер на годината, за овој прекрасен „Сер Алекс Фергусон“ трофеј, наречен по човекот на кого многу му се возхитувам“, беа првите зборови на Јирген Клоп.
Познато е ривалството помеѓу Ливерпул и Манчестер Јунајтед, чиј предводник беше популарниот Ферги, па вакви зборови искажани од човек кој е дел од Ливерпул и не се мала работа.
„Знам дека не е многу паметно како предводник на Ливерпул, но јас му се восхитувам. Тој беше првиот британски менаџер кој го запознав и со кој појадував. Беше одамна и не сум сигурен колку тој памети, но јас вечно ќе го помнам бидејќи за мене тоа беше како да сум го запознал папата“, открива Германецот.
„Беше навистина супер и уште од старт ни тргна муабетот. Тогаш не ни помислував дека еден ден ќе го држам в раце пехарот именуван по него. Задоволството е посебно со оглед на тоа што сум изгласан од мои колеги тренери“.
Токму Ферги е првиот освојувач на оваа награда од нејзиното воведување во 1993 година. Воедно, Шкотланѓанецот и најмногу пати ја освоил, вкупно 5, пред Дејвид Мојз со 3.