Јапонскиот ски скокач триумфираше во Оберсдорф, првата станица од традиционалната новогодишна турнеја Четири скокалници.
Рјоју Кобајаши со 302 поена заврши на првото место пред дуото Норвежани Халвор Егнер Гранеруд (299,2 бода) и Роберт Јохансон (298,6). И четвртото место го окупираше норвешки скокач и тоа Мариус Линвик.
Јапонецот го забележа и најдолгиот скок откако во финалната серија скокна 141 метар, со што го поправи резултатот од првата серија каде оствари скок од 128,5 метри.
Некогашниот великан Симон Аман заврши на 13. место со 258,4 поени, а комплетно разочара минатогодишниот шампион Камил Штох кој заврши дури на 41. место откако во првата серија скокна 118 метри и не ни влезе во финалето.
За прв пат бодови освои турски скокач и тоа Фатих Арда Ипџиолу кој се пласираше на 29. место со 224,7 бода.
Турнејата Четири скокалници продолжува во Гармиш-Партенкирхен со квалификациите на 31 и финалето на првиот ден од 2022 година. Потоа скокачите се селат во Австрија каде прво следува Инсбрук на 3 и 4, а се завршува на 5 и 6 во Бишофсхофен.
