Најдобриот пливач на сите времиња Мајкл Фелпс учествуваше во необичен и опасен експеримент. Исходот ќе се емитува во недела на Discovery Channel.
Американскиот пливач кој го држи олимпискиот рекорд по број на освоени медали (дури 28) соработуваше во интересен проект со Discovery во кој беше испитувано кој е побрз: тој или бела ајкула?
На овој начин ТВ-каналот сака да ја промовира серијата Shark Week, а не постои подобар ривал на белата ајкула од најдобриот пливач на сите времиња.
Идејата беше да се види колку најбрзо може да исплива Фелпс во солена вода на 100 метри. Шансите не му се многу големи: ајкулите може да развијат брзина до 55 километри на час, а најголемата брзина на Фелпс измерена досега е 9,6 км/ч.
Фелпс имаше помош од научници кои му направија специјална перка-опашка каква што имаат ајкулите.
„Чекајте малку, 20 години тренирам како лудак, пливам, а ова ќе ме направи побрз? Зошто досега не сте ми го покажале?“, се пошегува Фелпс.
За волја на вистината, Фелпс не пливаше со ајкулите, но пливаше на отворено море кај Јужна Африка каде ајкулите често „наминуваат“. Имаше блиска средба со ајкула, но беше во заштитен кафез. Сепак, и таквиот контакт изгледа страшно.
„Ова сакав да го направам цел живот, високо котираше на мојата листа на неисполнети желби, да ги видам одблиску овие животни во нивниот природен хабитат“, рече Фелпс.
Останува да видиме во недела кој навистина бил побрз.